Ընդհանուր նպատակ
 

Դասընթացը նպատակ ունի ձևավորել կոնֆլիկտների գիտակցված ընկալում և դրանց կառավարման պրակտիկ հմտություններ՝ «բռունցքային» (ուժային) մոտեցումից դեպի «ծաղկային» (կառուցողական, համագործակցային) հաղորդակցություն անցման միջոցով, ինչպես նաև պատկերացում կազմել հուզական ինտելեկտի մասին։

Ուսուցման արդյունքներ

ԻՄԱՆԱԼ

• Հաղորդակցության հիմնական սկզբունքները և չհասկացման պատճառները

• Կոնֆլիկտի տեսակները և դրանց առաջացման մեխանիզմները

• Մեհրաբյանի, Բերնի, Կարպմանի և Շուց ֆոն Թունի տեսությունների հիմունքները

• Կոնֆլիկտի խորքային և տեսանելի մակարդակների տարբերությունը
   

ԿԱՐՈՂԱՆԱԼ

• Ճանաչել կոնֆլիկտային իրավիճակները և դրանց տեսակները

• Վերլուծել հաղորդակցական խափանումները

• Կիրառել տեսական մոդելներ իրական իրավիճակներում

• Կառավարել էմոցիոնալ և վարքային արձագանքները կոնֆլիկտի ընթացքում
   

ԿԻՐԱՌԵԼ

• Կոնֆլիկտի կարգավորման արդյունավետ ռազմավարություններ

• Հաղորդակցության բարելավման գործիքներ

• Կոնֆլիկտից դուրս գալու կառուցողական մեխանիզմներ

• Միջանձնային հարաբերությունների կայունացման մոտեցումներ

Դասընթացի բովանդակություն
 

1․ Հաղորդակցության «այբուբենը» և չհասկացման խնդիրը

Այս թեման ներկայացնում է հաղորդակցության հիմքերը՝ որպես ցանկացած կոնֆլիկտի առաջացման կամ կանխման առանցքային գործոն։ Քննարկվում են հաղորդակցության խափանումների հիմնական պատճառները՝ լեզվական, հոգեբանական և մշակութային մակարդակներում, ինչպես նաև այն, թե ինչպես է սխալ ընկալումը ձևավորում կոնֆլիկտային իրավիճակներ։
 

2․ Կոնֆլիկտի տեսակները ու դրա կառավարումը

Ներկայացվում են կոնֆլիկտների հիմնական տեսակները՝ ներանձնային, միջանձնային և խմբային։ Ուսումնասիրվում են դրանց դինամիկան, զարգացման փուլերը և կառավարման հիմնական ռազմավարությունները՝ խուսափումից մինչև համագործակցային լուծումներ։
 

4․ 20-80 Այսբերգի տեսությունը

Այսբերգի մոդելը ցույց է տալիս, որ կոնֆլիկտի միայն փոքր մասն է տեսանելի, մինչդեռ հիմնական պատճառները գտնվում են «ջրի տակ»՝ արժեքների, զգացմունքների և չարտահայտված կարիքների մակարդակում։ Այս թեման օգնում է սովորել բացահայտել կոնֆլիկտի խորքային շերտերը։
 

5․ 7% – 38% – 55% Ա․ Մեհրաբյանի տեսությունը

Քննարկվում է հաղորդակցության ազդեցության բաշխումը՝ բառերի, ձայնի և ոչ վերբալ ազդակների միջև։ Հատուկ ուշադրություն է դարձվում այն փաստին, որ հաղորդակցության մեծ մասը տեղի է ունենում ոչ բառային մակարդակում, ինչը կարևոր է կոնֆլիկտների ճիշտ ընկալման և կարգավորման համար։
 

6․ Էրիկ Բերնի տեսությունը և կոնֆլիկտի կառավարումը

Ներկայացվում է տրանզակցիոն վերլուծության մոդելը՝ «Ծնող», «Մեծահասակ», «Երեխա» էգո-վիճակներով։ Վերլուծվում է, թե ինչպես են այս դերերը ազդում հաղորդակցության վրա և ինչպես կարող են առաջացնել կամ մեղմել կոնֆլիկտները։
 

7․ Կարպմանի եռանկյունին որպես հավերժ կոնֆլիկտային իրավիճակ

Բացատրվում է «Զոհ – Հետապնդող – Փրկիչ» մոդելը, որը նկարագրում է կրկնվող կոնֆլիկտային սցենարները։ Թեման ցույց է տալիս, թե ինչպես են մարդիկ անգիտակցաբար մտնում այս դերերի մեջ և պահպանում կոնֆլիկտը։
 

8․ Է․ Չոյի եռանկյունին որպես կոնֆլիկտային ելք

Ներկայացվում է Կարպմանի մոդելի փոխակերպված տարբերակը, որտեղ առաջարկվում են կառուցողական դերեր՝ պատասխանատվություն, աջակցություն և ինքնավարություն։ Այս մոտեցումը ցույց է տալիս կոնֆլիկտից դուրս գալու հնարավոր ուղիները։
 

9․ Ֆրիդման Շուց ֆոն Թուն և կոնֆլիկտի կառավարումը

Քննարկվում է «հաղորդակցության քառականջ մոդելը», ըստ որի յուրաքանչյուր հաղորդագրություն ունի մի քանի շերտ՝ փաստ, ինքնահայտնություն, հարաբերություն և ազդեցություն։ Այս տեսությունը օգնում է հասկանալ հաղորդակցության բազմաշերտությունը և կանխել սխալ մեկնաբանությունները։