ՆՊԱՏԱԿ

Ծրագրի նպատակն է դասընթացի մասնակիցներին տրամադրել համակարգված գիտելիքներ քաղաքացիական իրավունքի ընդհանուր դրույթների, իրավաբանական անձանց, պարտավորությունների, գործարքների, սնանկության, աշխատանքային, վարչական իրավահարաբերությունների, քաղաքացիական և վարչական դատավարության ընդհանուր դրույթների, օտարերկրյա ներդրումների վերաբերյալ:

Այս ամենը հնարավորություն կընձեռնի ձեռք բերել բազային հիմնական գիտելիքներ քաղաքացիական և ընդհանուր տնտեսական իրավունքի վերաբերյալ, որոնք անհրաժեշտ են ֆինանսական ոլորտում մասնագիտական գործունեություն ծավալելու համար:

Ի՞ՆՉ ԳԻՏԵԼԻՔՆԵՐ Է ՍՏԱՆՈՒՄ ՄԱՍՆԱԿԻՑԸ

• Քաղաքացիական և ընդհանուր առմամբ տնտեսական իրավունքի մասին բազային գիտելիքներ.
• Քաղաքացիական և տնտեսական իրավահարաբերությունները կարգավորող հիմնական նորմատիվային բազայի իմացություն․
• Գործարքների կնքման և դրանց կատարման առանձնահատկությունների մասին գիտելիքներ․
• Պայմանագրերի առանձին տեսակների, դրանց կնքման և կատարման մասին իմացություն․
• Արտապայմանագրային պարտավորությունների, վնասի և դրա հատուցման մասին ընդհանուր գիտելիքներ․
• Սնանկության վարույթի առանձնահատկությունների, աշխատանքային, վարչական իրավահարաբերությունների և օտարերկրյա ներդրումների իրավական կարգավորման մասին գիտելիքներ․
• ՀՀ դատարանակազմության, քաղաքացիական և վարչական դատավարության վերաբերյալ ընդհանուր բնույթի գիտելիքներ․
• Դասընթացի շրջանակներում դասավանդվող առանձին թեմաների վերաբերյալ գործնական հմտություններ։

ԾՐԱԳՐԻ ԿԱՌՈՒՑՎԱԾՔԸ

• Քաղաքացիական իրավունք․ ընդհանուր դրույթներ՝ քաղաքացիներ, իրավաբանական անձինք, առևտրային կազմակերպություններ, տնտեսական ընկերություններ, քաղաքացիական իրավունքի օբյեկտներ, արժեթղթեր, ընդհանուր դրույթներ պարտավորությունների մասին, պահանջի զիջում (ցեսիա) և պարտքի փոխանցում, պարտավորությունների կատարման ապահովումը, սեփականության իրավունք և սահմանափակ գույքային իրավունքներ։
• Գործարքներ, ներկայացուցչություն և հայցային վաղեմություն՝ գործարքների հասկացություն, ձևը և կնքման կարգը, անվավեր և առոչինչ գործարքներ, պայմանագրի հասկացությունը, պայմանագրի կնքման, փոփոխման և դադարման կարգը, պայմանագրի տեսակները, ներկայացուցչություն, լիազորագիր, հայցային վաղեմություն։
• Պայմանագրի առանձին տեսակները՝ առուվաճառքի, ծառայությունների մատուցման, կապալի, վարձակալության, նվիրատվության, գույքի անհատույց օգտագործման, ֆրանչայզինգի, ֆակտորինգի, փոխառության, վարկի, փոխադրման, գույքի հավատարմագրային կառավարման, ապահովագրության պայմանագրեր: 
• Մտավոր սեփականություն՝ ընդհանուր դրույթներ մտավոր սեփականության մասին, անհատականացման միջոցներ։
• Դելիկտային պարտավորություններ՝ վնասի հասկացությունը, հատուցման հիմքերը, վնասի առանձին տեսակներ, անհիմն հարստացում։
• Անվճարունակություն՝ սնանկության հասկացությունը, սնանկության հիմքերը, սնանկության վարույթը։
• Աշխատանքային իրավունք՝ աշխատանքային իրավունքի սկզբունքները, աշխատողի, գործատուի հասկացությունը, աշխատանքային պայմանագիր, աշխատաժամանակ, աշխատանքային պայմանագիրը լուծելը, աշխատանքային կարգապահություն։
• Վարչական իրավունք՝ վարչարարության  և վարչական վարույթի հասկացությունը, վարչական ակտ, վարչական ակտի բողոքարկումը։
• Քաղաքացիական և վարչական դատավարություն՝ ՀՀ դատարանները, քաղաքացիական և վարչական հայցի հարուցումը, հայցի տեսակները, վերաքննիչ և վճռաբեկ բողոքարկում։
• Պետական կարգավորում և օտարերկրյա ներդրումներ՝ լիցենզավորում, թույլտվություններ, օտարերկրյա ներդրումների հասկացությունը և ռեժիմները։

ՈՒ՞Մ ՀԱՄԱՐ Է ՆԱԽԱՏԵՍՎԱԾ

Քաղաքացիական և տնտեսական իրավունքի ոլորտում գիտելիքներ ձեռքբերելու ցանկություն ունեցող անձանց համար, ինչպես նաև այն անձանց համար, ովքեր ցանկանում են աշխատել ֆինանսական ոլորտում՝ որպես հաշվապահ, աուդիտոր կամ ֆինանսիստ:

Դասընթացը կվարի ԵՊՀ քաղաքացիական իրավունքի ամբիոնի դասախոս, «ԲԻ ԷԼ ՍԻ ԳՐՈՒՊ» Խորհրդատվական ընկերության կառավարող գործընկեր Արսեն Հովհաննիսյանը։